ساعات ببقى فرحان أوى و فعز فرحتى بكون زعلان أوى أوى
ساعات بحس إنى نكرة لإنى حاسس إنى مليش لازمة فالدنيـــا
ساعات بقعد و أقول طب أنا إتخلقت ليه؟؟؟!!.. إيه الهدف ..؟؟ أنا هنا ليه عالكوكب ده..؟
ساعات بكون متفوق و أحس إنى أكتر إنسان فاشل فالعالم
ساعات بحس إنى قوي جدا و ممكن أعمل أى حاجة... و مع أول حاجة ببقى ولا حاجة
ساعات لما بفكر فالحب و عذابه بتصعب عليا نفسى اللى إتهانت و إتذلت و مش لاقي نهاية سعيدة زى ماعودتنا الأفلام
ساعات بتصعب عليا نفسى خصوصا لما أحس إن أقرب الناس ليا مش حاسس بيا
ساعات بحس إن الساعات زى السيوف فإيد الحداد كل مايسنها و يحميها تقطع فيا و تزيد الآهات
ساعات ببقى عايز أعمل حاجة صح و فعز إستعدادى لعمل الصح بعمل الغلط..!!
ساعات كتير بتألم و بكون مجروح و مع ذلك بكون ساكت و كأن السكون هايخفف الألم مع إنه بيزوده
ساعات بفكر و بتصور إزاى ممكن أبنى مستقبلى بنفسى من غير مساعدة من حد و مع أول عقبة
بقف و أسيب القلم و الورقة و أمشى
ساعات بكون بسمع أغنية و فجأة ألاقينى عايز أسمع قرآن و بعدها بعشر دقائق أغنية...قرآن...أغنية
زى مايكون جوايا إتنين و كل واحد بيشغل الحاجة اللى تعجبه و انا ماليش قرار..!!
ساعات بشوف الغلط(أقصد الغلط الإدارى و السلوكى) و أبقى محروق من جوايا إزاى مش قادر أغير الوضع ده
و أكتشف إنى برتكب نفس الغلط بصورة أو بأخرى
ساعات بحس إن مصر دى هى السبب فالخنقة اللى أنا فيها بس برجع و أسأل نفسى(مش أنا مصر برضو؟؟)
ساعات ممكن تحس إنى إنسان كئيب عشان بكتب الكلام ده لكن صدقنى أنا عادى بضحك و بستغرب و بسأل و بحاور
و بعيش لكن الساعات هى صراع بيدور جوايا بالساعات